DILI– Selesaun Nasional sub-22 susesu koileta pontus tolu hafoin hurlele nia adversariu Filipina ho score 3-0 iha datoluk faze grupu (A) Sea Games Kambodia 2023.
Hala’o jogu iha Morodok Techo National Stadium, Phnom Penh, Kamboja kinta (04/05/2023). Selesaun Nasional Timor Leste ne’ebe mak derota uluk dala rua iha jogu dahuluk iha ambisaun boot hodi buka oportunidade hodi rekolla pontus tolu ho nune’e jogu foin hala’o minutu 14 Jogador Estrela Timoroan Mouzinho Barreto de Lima susesu produs golu furak hodi lori ekipa Lafaek nurak lidera ho score 1-0.
Avansadu ho numeru kamizola 10 ne’e marka golu hafoin simu assitensia bola pasagen hosi nia kompatriota Jhon frith de Oliveira iha linha klaran.
Ho score refere halo ekipa Lafaek kontinua domina bola hodi fo presaun makas ba adversariu no tama ba iha minutu 27 Filipina tenke lakon jogador Denis Chung, hafoin hetan kartau mean tanba hamonu jogador Joao Bosco Halle.
Menus jogador ida Timor Leste kontinua domina liu bola hodi lansa presaun ba Filipina Maibe to’o termina jogu primeira parte score mantein 1-0.
Kontinua ba jogu segunda parte Filipina tenta hodi halo balansu ba score Liu hosi kontra atake ne’ebe makas maibe tama ba iha minutu 54 Timor Leste haboot liu tan score ba 2-0 liu hosi asaun Luis Figo.
Futebolista ho numeru kamizola 17 ne’e marka golu hafoin simu assitensia bola pasagen hosi Jhon frith de Oliveira iha linha klaran.
Lidera ho score 2-0 halo ekipa Samba Asia ne’e domina liu tan jogu ho nune’e tama ba iha minutu 90 Timor Leste konsege produs tan golu ida hodi haboot liu tan score ba 3-0 liu hosi asaun jogador Elias Mesquita.
Jogador Academica Fc ne’e produs golu hafoin simu assitensia bola pasagen hosi Zenivio Mota iha linha iskerda hodi taka jogu ho score 3-0.
Hosi rezultadu vitoria dahuluk ekipa Lafaek ne’e hatuur ekipa iha pozisaun 4 ho pontus tolu hosi jogu dala tolu mana Ida no derota dala rua.
Iha jogu ikus faze grupu A ekipa Lafaek sei kontra Indonesia.
JHD
