DILI — Selesaun Nasional sub-22 Timor Leste derota ho adversariu Indonesia ho score 3-0, iha jogu ikus faze grupu (A) Sea Games ba edisaun 32 Cambodia 2023.
Jogu entre Indonesia kontra Timor Leste ne’e hala’o iha National Olympic Stadion Phnom Penh, Kamboja, Domingu (7/5/2023). Desde inisiu jogu durante minutu 10 nia laran Ekipa Lafaek nurak sub-22 hetan presaun makas hosi Makikit Indonesia.
Maibe defeza hosi ekipa samba Asia ne’e mantein linha metin hodi la iha fo fatin ba adversariu hodi produs golu.
Selsaun nasional konsege kore aan hosi presaun makas Indonesia no konsege lansa suta fila fila ba rede Indonesia maibe guarda defensivu hosi Indonesia mantein solidu hodi la fo fatin Timor Leste hodi marka golu.
No tama ba iha minutu 45 rede Timor Leste nakles liu hosi asaun kabesada hosi Sananta hafoin simu assitensia bola kruza hosi nia kompatriota Fajar. Hodi lori Indonesia lidera ho score 1-0 to’o termina jogu primeira parte.
Kontinua ba jogu segunda parte tensi jogu komesa makaas liu tan no ba ekipa rua ne’e hodi lansa kontra atake ba malu maibe tama ba iha minutu 62 sorti diak monu ba ekipa Indonesia hodi hasae score ba 2-0 liu hosi asaun Mohammad Fajar.
Golu refere akontese hafoin Makikit nurak halo kontra atake ne’ebe lais hosi linha iskerda hafoin fura rede ekipa Lafaek.
Ho score refere jogu sa’i manas liu tan ba ekipa rua ne’e no tama ba iha minutu 75 Mohammad Fajar hamorin hikas nia naran hodi hasae score ba 3-0.
Maske lidera ho score 3-0 halo ekipa garuda la redus sira nia ritmu jogu hodi domina liu tan liu hosi atake ne’ebe makaas maibe to’o termina jogu segunda parte score mantein 3-0. Vitoria ba Indonesia.
Hosi rezultadu derota ne’e halo ekipa Lafaek nurak sub-22 tenke fila sedu iha faze grupu tanba rekoila deit pontus 3 hosi jogu dala haat manan dala ida no derota dala tolu.
Enkuantu Indonesia hakat ona ba meias finais jogu Sea games Kambodia 2023.
JHD
