DILI– Klubu futebol primeira divizaun Kota Ranger Fc hosi nasaun Brunei Darussalam kontrata ona jogador selesaun nasional Elias Joao Mesquita durante tinan ida.
“Ha’u asina ona kontratu ho Klubu primeira Divizaun Kota Ranger Fc durante tinan ida” dehan Elias Meskita ba JHD via whatsApp Kuarta (24/05/2023).
Eis jogador Lalenok United Fc, no Assalam Fc ne’e hatete, ne’e nu’udar esperensia dahuluk ba joga iha klubu hosi nasaun liur tanba ne’e nia sente kontente.
“Ida ne’e mai sente orgullu teb-tebes tamba bele aumenta ha’u nia skill nuudar futebolita ida, no ha’u rasik hakarak kontinua nafatin ha’u nia talentu i iha parte ida ha’u hakarak kria netik historia ba ha’u nia an se wainhra ha’u idade to ka pensiun karik ha’u mos iha ona historia rasik kona ba joga la’o individu ba joga iha nasaun ida” Elias afirma.
Jogador selsaun nasional ne’e mos iha esperansa boot hakarak atinje objektivu klubu nian ne’ebe mak hakarak sa’i vensedor.
Biodata badak hosi Elias Meskita
Elias Meskita hahu nia kareira futebol iha tinan 2015 hamutuk ho klubu priemeira divizaun Aitana Fc.
Iha tinan 2016 Elias muda hosi Aitana Fc hodi ba haforsa Klubu promovidu Lalenok United iha terseiru divizaun no iha tinan ne’eba Elias ho ekipa susesu lori Lalenok United promove ba segunda divizaun iha tinan 2017.
Iha tinan 2018 Elias Meskita nafatin hetan fiar hodi haforsa Lalenok United iha tinan ne’eba susesu lori Lalenok United promovidu ba primeira divizaun Liga Futebol Amadora.
Iha tinan 2019 futebolista foin sae ne’e nafatin hetan fiar nuudar avansadu prinsipal Lalenok United no iha tinan 2019 nia konsege hatudu performa berliante hodi marka istoria foun ba klubu promovidu refere hodi sai tribel winner Liga Futebol Amadora (LFA) no kopa 12 de Novembru no mos Super Taca.
Ho kampeaun refere lori ekipa Lalenok United Fc nuudar ekipa dahuluk ne’ebe tama iha kualifikasaun AFC Cup 2019, no Elias Meskita mraka rekord foun nuudar jogador ho idade ne’ebe mak kiik liu mak joga iha AFC cup
Iha Tinan 2020 Elias Meskita kontinua hetan fiar husi klubu Lalenok United Fc no iha tinan ne’eba perpforma berliante ne’ebe mak nia hatudu ho nia ekipa susesu raut tan trofeu rua mak Kopa FFTL no Kopa 12 de Novembru.
Iha tinan 2021 Elias Meskita nafatin hetan konfiansa hosi klubu Lalenok United Fc nuudar avansadu prinsipal.
Iha kompetisaun liga Timorense epoka 2022-2023, Elias Meskita haforsa fila fali Klubu priemeira divizaun Assalam Fc nuudar avansadu ho numeru kamizola 10.
Ho performa ne’ebe mak Elias Meskita hatudu hamutuk ho klubu konsege hetan fiar Hosi Treinador selesaun nasional sub-16 Mister King hodi ba joga iha Thailandia iha tinan 2017.
Laos deit ho sub-16 maibe Elias mos nafatin hetan fiar hodi haforsa selsaun nasional sub-17 to’o selsaun nasional senior ate agora sei ativu nuudar avansadu iha sub-22 no selsaun nasional senior.
JHD
