DILI– Sekretariu Jeral Asosiasaun Futsal Timor Leste (AFTL) Fernando Batista, klarifika AFTL la dukur no halo ona esforsu makas no prontu ona atu organiza Liga Futsal Timor Leste ba primeira divizaun no segunda divizaun iha fulan Agustus.
Fernando Batista hato’o lia hirak ne’e hodi hatan ba deklarasaun hosi Sekretariu jeral Mushila Fc ne’ebe mak konsidera AFTL dukur hodi la organiza durante tinan rua nia laran.
“AFTL la dukur karik sekjen Mushila Fc mak lanu ou nia amnesia hela ita nia Kalendariu ne’e aprezenta ona ba FFTL desde 2022 hetan konesementu hosi Sekretariu jeral FFTL ita mos hetan premisaun atu konvoka klubu sira atu halo enkontru konaba atu loke janela transferensia ita konvoka enkontru iha dia 22 setembru 2022 ho klubu sira i klubu sira rasik mai aseita i ita loke janela transferensia klubu ida deit mak mai rejistu restu mai rona deit informasaun” Fernando Batista informa ba JHD iha nia knaar fatin AFTL Formoza Dili Segunda (29/05/2023).
Nia haktuir Iha enkontru Ikus klubu sira nia perkupasaun sira hakarak rona lai premiu de jogu kampeaun no seluk tan ho nune’e konvoka fali reuniaun iha dia 2 dezembru 2022 ne’e klubu sira hotu partispa no deputi FFTL rasik ne’ebe mak akompainha rasik proposta sira ne’e mos ita elabora AFTL la mesak deputi rasik mak aprezenta premiu jogu premiu kampeaun i subsidiu no klubu hotu satisfas ho ida ne’e.
Nia explika AFTL esforsu makas ona hodi husu kampu ba SEJD no F-FDTL, maibe ita hotu sei labele halo buat ida karik Exco seidauk deside seidauk aprova ita nia Kalendariu ne’ebe ita submete ba.
Nia dehan, Iha reuniaun Exco domingu (28/05) aprova ona maibe ninia montante ne’e mak la koresponde 100 pursentu ho proposta ne’ebe mak AFTL submete ba tanba ne’e mak iha tempu badak parte AFTL futsal officer ho FFTL sei tuur hamutuk konvoka para reuniaun ho klubu sira atu bele hato’o ba klubu sira katak verba ne’ebe mak diaponibiliza aprovadu hosi exco mak hanesan ne’e.
“Ita Nia Kalendariu tentantiva ne’e se ita konsege duni iha konkordansia ho klubu sira wainhira kuandu ita tuur hamutuk iha semana oin ne’e ita loke janela transferensia hahu hosi fulan junhu no fulan jullu bele raliza ona ou tarde liu fulan Agustu ne’e liga lao ona” Nia Informa.
Nia hatutan, Vise prezidente FFTL Falur Rate laek koalia katak sira disponivel para AFTL atu bele ba uza fali kampu F-FDTL nian ne’ebe karta ohin haruka ba ona.
Tuir Kalendariu AFTL sei hahu uluk Liga futsal primeira divizaun ne’ebe sei hala’o ho full kompetisaun. No segunda divizaun sei hala’o ho metade de kompetisaun
Rekorda fali katak klubu hirak ne’ebe mak sa’i sa’i hanesan membru ba iha AFTL hamutuk 24 kompostu hosi priemeira divizaun 10 no segunda divizaun 14 priemeira divizaun mak hanesan Ramelau Fc, Mushila Fc, Boa Sorte Fc, Because United, Mauputar Fc, Sao Francisco Xavier, Caesar Dante Fc, AD Samoro, Gamer FC no As Jerman Fc.
Enkuantu hosi segundu divizaun mak hanesan, Coelho FC, Bermeta FC, Maudoko FC, Academica Fc, B’tal FC, VDL Lahane Boavista Fc Timor Santa Cruz, AD Estrela Baguia, Kuda Ulun, Crezy Horse, FIEL FC, Baucau all Star.
JHD