DILI– Ekipa Futsal mane hosi Ministeru obras publika (MOP) susesu hakat ain ba faze 8 finais BNCTL Cup 2023 hafoin “dere” nia adversariu institutu superior Cristal (ISC) ho score fantastiku 5-2 iha faze eliminasaun 16 finais ne’ebe mak hala’o iha kampu multifunsaun bebora Dili, Segunda (26/06).
Desde inisiu jogu ekipa rua ne’e hala’o jogu ho kuidadu tebes hodi mantein linha ne’ebe solidu hodi la fo fatin ba malu atu marka golu.
Maibe tama ba iha minutu 10 sorte diak monu ba ekipa MOP hodi fura rede ISC liu hosi asaun individual Juliao hodi muda score ba 1-0.
Ho score refere jogu tensi jogu komesa manas liu tan ba ekipa rua ne’e hodi lansa presaun ba malu maibe to’o termina jogu primeira parte ekipa MOP mantein lidera ho score 1-0.
Kontinua ba jogu segunda parte intensidade jogu komesa makaas liu tan ba ekipa rua ne’e hodi lansa presaun ba malu ho agresivu liu tan maibe ekipa ekipa MOP ne’ebe mak sa’i kampeaun iha BNCTL Cup 2022, iha ambisaun boot hodi save metin titulu kampeaun ho nune’e konsege produs tan golu 4 iha segunda parte.
Enkuantu atake ne’ebe mak lansa hosi ekipa ISC konsege responde golu rua ho nune’e to’o termina jogu segunda parte vitoria ba MOP ho score 5-2.
Hosi rezultadu vitoria ne’e lori ekipa MOP hakat ba faze 8 finais BNCTL Cup 2023, enkuantu ekipa ISC tenke elimina hosi BNCTL Cup 2023 tanba jogu ne’e sistema bota fora ka lakon sa’i.
Entertantu jogu Futsal BNCTL Cup 2023 ne’e organiza hosi Joventude Hadomi Despotu (JHD) ho objetivu atu selebra aniversariu BNCTL ba dala 12.
JHD
