DILI– Treinador ekipa futsal femenina Banku Nasional Timor Leste (BNCTL), Marta Martins Ricardo, hatete, BNCTL optimista sei halakon nia adversariu Banku Nasional Ultramarinu (BNU) iha faze eliminasaun 16 finais BNCTL Cup 2023 ne’ebe mak sei realiza iha kampu multifunsaun bebora Dili tersa (27/06).
Kompetisaun BNCTL Cup 2023 ne’ebe mak organiza hosi Joventude Hadomi Despotu (JHD), ne’ebe partisipa hosi ekipa hamutuk 84 kompostu hosi ekipa femenina 36 no ekipa mane 48 ofisialmente termina ona faze apuramentu no ekipa hamutuk 64 kompostu hosi ekipa femenina 32 no ekipa mane 32 mak susesu hakat ba faze eliminatoriu 16 finais.
Ekipa Uma nain BNCTL Femenina ne’ebe mak ultrapasa ba faze eliminasaun 16 finais nuudar runner-up grupu (A) sei hasoru adversariu BNU ne’ebe mak hakat ba faze eliminasaun 16 finais ne’e nuudar kampeaun grupu (B), maske nune’e ekipa uma nain BNCTL fiar aan tebes sei halakon adversariu.
Liu hosi entervista ho Media Joventude Hadomi Despotu (JHD) segunda (26/07), Treinador ekipa femenina BNCTL, Marta Martins Ricardo, hatete, maske tama ba Faze Eliminasaun nudar runner-up maibe sira fiar aan sei manan tanba sira nuudar ekipa uma nain.
“BNCTL no BNU nudar instituisaun finanseira hotu. Mais ou menus ami hatene malu ami nia ekipa jogadores. Nudar uma na’in ami sei halo preparasaun masimu liu husi haforsa jogadores nia fisiku no mentalidade, liu-liu tekniku hodi hasoru ekipa BNU. Ami optimista sei manan BNU maibe buat hotu desizaun ikus husi Maromak” dehan Treinador Marta Martins Ricardo ho fiar aan.
“Motivasaun sira mak Ami nudar uma nain, Iha jogos anterior sira iha BNCTL Cup ou BCTL Cup, ekipa BNU mos ekipa forte ida” dehan Treinador ne’e.
Treinador ne’e rekonese katak ekipa mos BNU nuudar ekipa forte tamba tama mos faze eliminasaun nudar juara pool. Maske nune’e Treinador ne’e fo prediksaun katak nia ekipa sei manan adversariu ho score 6-2.
JHD
