DILI– Treinador ekipa futsal Mane hosi Ministeru Obras Publika (MOP), Martinho Ribeiro, optimista nia ekipa sei halakon adversariu Institutu Superior Cristal (ISC) iha jogu BNCTL Cup 2023 faze eliminasaun.
Kompetisaun Taxa BNCTL Cup 2023 ne’ebe mak organiza hosi Joventude Hadomi Despotu (JHD), ne’ebe partisipa hosi ekipa hamutuk 84 kompostu hosi ekipa femenina 36 no ekipa mane 48 ofisialmente termina ona faze apuramentu no ekipa hamutuk 64 kompostu hosi ekipa femenina 32 no ekipa mane 32 mak susesu hakat ba faze eliminatoriu 16 finais.
Ekipa Ministeru Obras Publika ne’ebe mak foti titulu kampeaun taxa BNCTL Cup 2022, no tinan ne’e mos hakat ba faze eliminatoriu nu’udar kampeaun grupu (A) ho pontus 9 hosi jogu tolu manan hotu sei hasoru adversariu Institutu Superior Cristal (ISC), ne’ebe mak hakat ba faze eliminasaun nu’udar runner-up grup (B).
Ekipa rua ne’e sei kontra malu iha faze 16 finais, iha loron segunda (26/06). Maibe ekipa MOP ne’ebe mak hakat ba 16 finais nu’udar kampeaun grupu halo Treinador ekipa MOP, Martinho Ribeiro, fiar aan atu halakon nia adversariu ISC hodi bele save metin titulu kampeaun.
“Depois sai kampiun Grupo (A) MOP hanesan mos juara bertahan laiha preparasaun special atu hasuru ISC maibe ami sei mantein nafatin ami jogu atu bele utrapasa ba fase tuir mai” dehan Treinador MOP ne’e ba JHD, iha kampu multifunsaun bebora Dili domingu (25/06).
Treinador hatutan, sira garante atu manan iha jogos ne’e tamba MOP nian jogadores kompletu no iha preparasaun diak.
“MOP Fc hanesan juara bertahan sempre nakonu ho esperansa para atu bele manan iha eventu ne dala ida tan ne mak MOP nia motivasaun” Martinho hatete ho fiar Aan.
Treinador ne’e mos fo prediksaun katak nia ekipa sei manan adversariu ISC ho score 2-0.
JHD
