DILI– Jogu kontinuasaun faze eliminasaun 16 finais Torneo BNCTL Cup 2023, ekipa Timor Plaza manan nia ekipa adversaiu Ministeru Esnsinu Superior Siensia no Kultura (MESCC sigla portugues) liu hosi drama adu penalti, hafoin ekipa rua ne’e empata ho score 3-3 iha tempu normal.
Jogu entre ekipa rua ne’e hala’o iha kampu multifunsaun Bebora Dili, Kinta (29/06), jogu 16 finais ne’e nuudar faze Knock Out, tanba ne’e desde inisiu jogu priemeira parte ekipa rua ne’e hala’o jogu kontra atake ba malu kuidadu tebes hodi mantein linha defensivu ne’ebe mak solidu.
Maibe tama ba iha minutu 3 ekipa Timor Plaza susesu fura rede MESCC liu hosi asaun jogador Joe hodi hatuur score ba 1-0.
Maske nune’e score refere ladura to’o tempu naruk tanba liu deit minutu MESCC konsege responde kedas hodi halo balansu ba score sa’i 1-1 liu hosi kapitaun ekipa Salvador Pires.
Ho score refere jogu sa’i manas liu tan ba ekipa rua ne’e hodi lansa presaun ba malu no tama ba iha minutu 14 ekipa MESCC lidera hikas ho score 2-1 too termina jogu primeira parte.
Tama ba iha jogu segunda parte intensidade jogu komesa manas liu tan ba ekipa rua ne’e no tama ba iha minutu 24 ekipa Timor Plaza konsege responde hikas golu ida hodi halo balansu ba score sa’i 2-2.
Maibe liu deit minutu ida Hipolito lori ekipa MESCC lidera hikas ho score 3-2.
No tama ba iha minutu 36 ekipa Timor Plaza responde hikas golu ida hodi halo balansu ba score sa’i 3-3 liu hosi asaun Rogerio.
Ho Score refere tensi jogu komesa manas liu tan ba ekipa rua ne’e hodi lansa kontra atake ba malu maibe to’o termina jogu la iha tan golu ruma mak akontese.
Hosi rezultadu empata ne’e obriga ekipa rua ne’e tenke hakat ba suta panaltu. No iha drama adu penalti ne’e ekipa Timor Plaza manan ho score 4-3.
Vitoria ne’e lori ekipa Timor Plaza hakat tan pasu ida ba 8 finais jogu BNCTL cup 2023 no ekipa MESCC elimina ona hosi eventu refere.
JHD
