DILI–Komisaun organizadora ba Taça Esperança 2023 motiva estudante sira atu bele hakat tuir jogador legendariu Timoroan sira hanesan Luis SImoes, Miro Balado Bento no mos Paulo Domingos Gally Freitas.
Liu hosi Dada sorteu ba Torneo Taça Esperança 2023, ne’ebe mak hala’o iha Otel City-8 domingu, (27/08), ne’e komisaun organizadora fanun estudante foinsae sira atu hakat tuir futebolista Legendariu Timoroan sira.
Miro Balado Bento rasik antes sa’i mellor markador ka (top score) wainhira sei reprezenta Indonesia iha jogu AFF ne’ebe mak antes ne’e ho naran Tiger Cup.
Aleinde ne’e Miro Balado Bento mos haforsa ona klubu barak iha Liga 1 Indonesia hanesan PSM Makassar, Persijap Jepara, Persmin Minahasa, Persiba Balikpapan, Persela Lamongan, PSBL Langsa, no ikus liu PSIS Semarang ne’ebe mak dadaun Gally Freitas hahu ho ninia kareira ba iha Liga 1 Indonesia nian.
Ho prezensa Jogador Legendariu ne’e komisaun organizadora hakarak motiva foin sae Sira atu bele hakat tuir liu hosi Taça Esperança ne’ebe mak dadaun ne’e sira realiza.
“Ami hakarak motiva alin estudante sira iha ita nia leet futebolista legendariu Luis SImoes, Miro Balado Bento, jogador nain rua ne’e sira ne’e uluk hatudu ona laos iha tempu ukun aan maibe iha tempu Indonesia nian sa’i mos Ikon ida ba Timor Timur iha momentu ne’eba” Dehan Kordenador komisaun organizadora Domingos Caeiro iha nia diskursu hodi motiva estudante hosi eskola 16 ne’ebe mak partisipa iha Taça Esperança 2023.
“Ami konvida sira mai atu motiva alin sira para hatete katak futebol ne’e investimentu ida, futebol ne’e mos servisu ida alin sira diak liu holo tuir maun sira para buka problema iha kampu laran laos buka fali problema iha liur” dehan nia hodi enkoraja estudante sira.
“Iha mos ita nia leet agora viral, teb-tebes ne’e mak uluk joga iha SLB agora joga iha Karketu, maibe agora sa’i fali ba PSIS Semarang Gally Freitas” tenik nia.
Tuir nia, Timoroan sira barak mak iha talentu ba futebol tanba ne’e nia husu ba diak hanoin iha vise prezidente FFTL Falur Rate Laek no Sekretariu jeral FFTL Gregoriu Correia para ba futuru haree programa ne’ebe diak atu bele hamosu tan talentu barak liu tan.
“Tuir lolos ne’e ohin marka mos prezensa iha ne’e Joao Pedro (JP) maibe tanba kondisaun saude la permite entaun nia la mai nia agora dadauk joga iha Benifica Macau” Nia afirma.
Aleinde ne’e, kordenador Komisaun Organizadora ne’e mos aprezenta Treinador Timoroan Francisco Araujo ne’ebe mak hetan fiar hosi klubu Benifica Macau hodi sai Treinador iha klubu refere.
Entertantu Taça Esperança 2023 nee partisipa hosi Eskola Secundariu Geral no privadu hamatuk 16 mak hanesan 12 Novembru, SACROJES, Herois da Patria, ESTV EEC Becora, Externato São José, Canossa, 5 de Maio, 4 Setembru, São Pedro, São José Operario, Colegio São Miguel Arcanjo, Paulo VI, Cristal, An’nur, Café Taibesse no Nicolao Lobato.
No liu hosi sorteo ne’e Eskola Sekundariu Geral Nikolau Lobato mak sei jogu abertura ho Ensinu Sekundariu Geral Sagrada Corasao De Jejus (Sacrojes) iha kampu federasaun futebol Timor Leste (FFTL) iha loron 30 fulan agustu ne’e.
JHD
