DILI — Ensinu Sekundariu Geral (ESG) Nikolau Lobato Komoro Dili susesu koileta pontus tolu (3) hafoin festa golu ba nia adversariu Ensinu Sekundariu Geral Sagrada Coracao De Jejus (Sacrojes) ho score 5-1 iha jogu abertura Taça Esperança 2023.
Jogu entre ekipa rua ne’e hala’o iha kampu Federasaun Futebol Timor-Leste (FFTL), bairo Formoza Dili, kuarta (30/08).
Desde inisiu jogu ESG Nikolau Lobato, domina liu bola hodi lansa presaun makas ba adversariu Sacrojes, ho dominante bola ne’e konsege fo rezultadu pozitivu tanba jogu foin lao minutu 7 ESG Nikolau Lobato lidera ona ho score 1-0 liu hosi asaun Anjo Soares.
Ho golu ne’e halo ESG Nikolau Lobato kontinua domina liu tan bola no liu deit minutu 3 Eskola Nikolau Lobato aumenta tan golu ida hodi hasae score ba 2-0 liu hosi jogador Albino Pereira.
Sofre ona ho score 2-0 halo ekipa Sacrojes tenta atu halo kontra atake ba Nikolau Lobato maibe tama ba iha minutu 40 Eskola Nikolau Lobato produs tan golu ida hodi haboot liu tan score ba 3-0.
La para ho ida ne’e antes atu termina jogu primeira parte Baltazar Lopez produs tan golu ida hodi lori nia ekipa Nikolau Lobato lidera metin ho score 4-0 iha jogu priemeira parte.
Kontinua ba jogu segunda parte tensi jogu komesa manas liu tan maibe ekipa Sacrojes ne’ebe mak sofre uluk golu 4 iha priemeira parte konsege halo mudansa ba tatika hodi hasoru Nikolau Lobato.
Maibe tama ba iha minutu 59 ekipa Nikolau Lobato produs tan golu ida hodi haboot score ba 5-0. Liu hosi asaun Savio Pires.
Eskola Sacrojes foin mak responde golu ida iha minutu 62 liu hosi asaun Sabino Gomes hodi muda score ba 5-1.
Ho score refere jogu kontinua manas liu tan ba ekipa rua ne’e hodi lansa kontra atake ba malu maibe to’o termina jogu segunda parte score mantein 5-1.
Hosi rezultadu vitoria ne’e lori ekipa Nikolau Lobato lidera provizoriu pool A Taça Esperança 2023 ho pontus 3.
Enkuantu ekipa Sacrojes iha pozisaun ikus liu ho pontus 0.
JHD
