DILI — Ensinu Sekundariu An-Nur sei hala’o jogu dahuluk kontra adversariu Herois da Patria iha jogu kontinuasaun Taça Esperança 2023, faze apuramentu pool (D) ne’ebe mak sei realiza iha kampu Federasaun Futebol Timor-Leste (FFTL) Domingu (03/09).
Liu hosi konferensia imprensa Treinador Ensinu Sekundariu An-Nur Hasan Ramos Costa hatete jogu dahuluk ne’e hanesan final ba sira tanba ne’e sira iha ambisaun atu asegura pontus tolu hodi motiva jogador sira iha jogu rua tuir mai.
“Ami sente ami nia perparasaun masimu ona tanba semana hira ona ne’e ami perparasaun ba Herois da Patria tanba ami tarjetu ne’e jogu primeiru ami persija manan ne’e ami konsidera jogu primeiru ne’e hanesan final, ami tenke foti 3 pontus ba ami nia eskola” dehan Husan Ramos iha stadion Munisipal Dili Sexta (01/09).
Nia explika, vitoria iha jogu priemeiru ne’e hanesan motivasaun ida ba jogador sira hodi jogu tuir mai kontra adversariu Paulos VI ho Cristal atu jogador sira bele semangat.
“Ami jogador 96% kondisaun feet atu joga maibe ami treiste oituan mak ami nia jogador nain rua sofre aleiza maibe ha’u fiar iha jogu kontra Herois da Patria sira la joga maibe iha jogu rua tuir mai kontra Paulos VI ho Cristal ne’e sira sei tun kampu” tenik nia
Maske sein prezensa hosi sira nain rua maibe iha ona jogador suplente ne’ebe mak sei subtitui sira nain rua tanba ne’e sei la fo impaktu ba ekipa tanba ekipa perparadu.
To’o notisia ne’e publika JHD seidauk halo konfirmasaun ho Herois da Patria tanba la marka prezensa iha konferensia imprensa ne’ebe mak realiza iha Estadion Munisipal Dili.
JHD