DÍLI– Ensinu Sekundariu Cristal susesu koileta pontus tolu (3), hafoin halakon nia adversariu Colegio Paulos VI, ho score mihis 1-0, iha jogu dahuluk faze apuramentu pool (D) Taça Esperança 2023 ne’ebe mak hala’o iha kampu Federasaun Futebol Timor-Leste FFTL formoza Dili Domingu (03/09).
Iha inisiu jogu eskola Cristal hala’o jogu ho agresivu hodi lansa presaun makas ba Colegio Paulos VI maibe defeza hosi Paulos VI mantein solidu hodi la fo fatin ba Eskola Cristal atu marka golu.
Golegio Paulos VI laos la iha oportunidade, Paulos VI konsege halo kaunter atake ne’ebe efetivu iha primeira parte maibe guarda defensivu hosi Cristal hala’o jogu ho kuidadu hodi asegura kaunter atake ne’ebe lansa hosi Paulos VI. Ho nune’e score 0-0 mantein la muda to’o termina jogu primeira parte.
Kontinua ba jogu segunda parte intensidade jogu komesa manas liu tan ba ekipa rua ne’e hodi lansa kontra atake ba malu, maibe eskola Cristal ne’ebe mak kontinua domina bola susesu fura rede eskola Paulos VI liu hosi asaun Fernando da Silva iha minutu 55.
Futebolista ho numeru kamizola 9 ne’e marka golu hafoin simu asistensia bola kruza hosi nia kompatriota hosi linha iskerda hodi lori nia ekipa Cristal lidera ho score 1-0.
Ho golu ne’e tensi jogu komesa makas liu tan ba ekipa rua ne’e hodi lansa kontra atake ba malu maibe ekipa hosi Paulos VI ne’ebe mak hahu monu iha rejistensia halo ekipa Cristal aproveita hodi lansa suta fila fila ba rede Paulos VI maibe guarda defensivu hosi Paulos VI mantein solidu hodi la fo fatin ba Cristal atu marka tan golu ho nune’e to’o termina jogu segunda parte score mantein 1-0 vitoria ba Cristal.
Jogu ne’ebe mak hala’o deit ho tempu minutu minutu 80 ne’e la hamate espiritu kompetetivu hosi estudante sira nia atu hatudu sira nia skiil no talentu ne’ebe sira iha.
JHD
