DILI– Fc Coelho susesu sa’i kampeaun ba Liga Futsal Timor Leste Segundu divizaun epoka 2023, hafoin halakon nia adversariu Santa Cruz Fc iha Final ho score 6-2.
Jogu final ne’e hala’o iha kampu F-FDTL fatuhada Dili, Kinta, (14/09). Iha inisiu jogu ekipa rua ne’e hotu hotu tun ho ambisaun boot hakarak sa’i kampeaun ba Liga futsal Timor Leste segunda divizaun, maibe ekipa Coelho Fc ne’ebe mak domina liu bola no konsege lidera uluk ho score 1-0, wainhira jogu foin lao iha minutu 4.
Golu refere marka hosi jogador Nikxon Martins.Ho golu ne’e halo tensi jogu komesa manas liu tan ba ekipa rua ne’e hodi lansa kontra atake ba malu maibe to’o termina jogu primeira parte ekipa Coelho Fc mantein lidera ho score 1-0.
Kontinua ba jogu segunda parte intensidade jogu komesa makas liu tan maibe ekipa Coelho Fc ne’ebe mak hatudu ritmu jogu ne’ebe diak konsege fura tan rede Santa Cruz Fc liu hosi jogador Rivaldo Pereira iha minutu 22 hodi hasae score ba 2-0.
Liu deit minutu 2 Lexi Atok halo rede Santa Cruz nakdoko hodi muda aumenta score ba 3-0.
Santa Cruz Fc konsege responde golu ida iha minutu 25 liu hosi asaun Bosco Martins hodi muda score sa’i 3-1.
Coelho Fc haboot hikas score ba 4-1 Iha minutu 27 liu hosi asaun Daviano Soares.
No Antonio Ximenes Marka tan golu rua tuir malu iha minutu 29 no 38 hodi haboot liu score ba 6-1.
Santa Cruz Fc foin mak responde tan golu ida iha minutu 39 hodi taka jogu ho score 6-2.
Hosi rezultadu ekipa Coelho Fc mak sai kampeaun ba Liga futsal Timor Leste segunda divizaun no Coelho Fc mos ekipa uniku ne’ebe mak desde faze apuramentu nunka derota to’o final.
JHD
