DILI – Prezidente Komisaun Regulador Arte Marsiais (KRAM), Octavio da Conceição, sadik, lideransa Organizasaun Persaudaraan Setia Hati Terate (PSHT) Timor Leste atu dezenvolve organizasaun ne’e sai modalidade desportu ne’ebé di’ak liu tanba PSHT halibur lideransa intelektual barak maibé kontrolu seidauk másimu iha baze.
“PSHT halibur ema matenek barak liu iha Timor iha organizasaun PSHT hanesan Doutór nivel ho Akademiku kuaze na’in-11, Mestradu kuaze 60 resin, licensiatura besik 4.000 resin, iha baze de dadus ami ida-ida haree lor-loron, Maibé organizasaun PSHT seidauk la’o másimu, foin ba iha kuantitativu seidauk aposta ba kualitativu, entaun ida ne’e ha’u sadik lideransa PSHT kontinua dezenvolve organizasaun ne’e sai modalidade desportu ne’ebé di’ak liu iha futuru,” Prezidente KRAM, Octavio Conceição, ba Jornalista hafoin abartura formasaun arbitarjen ho Juiz iha Ótel Ramelau, Aimutin, Sabadu (21/10/2023).
Octavio afirma, ranting PSHT iha Timor Leste hamutuk 495, maibé membru sira kuaze seidauk koñese estrutura nasionál, ida ne’e problema PSHT nian, entaun presiza hadi’a iha futuru.
“Ha’u kontenti semana kotuk viajen ba Baukau haree ranting PSHT di’ak liu iha Timor, sira prienxe rekizitu ne’ebé hatuur iha segundu deritiva KRAM,” Octavio Conceição haktuir
Prezidente KRAM ne’e afirma, PSHT loke ranting la prienxe rekizitu segudu deritu KRAM sei foti medida hodi taka, tanba ne’e konsolida no hadi’a aan para depois buka rezolusaun konflitu ne’e politiku IX Governu nian.
Tanba IX Governu Konstituisional mai ho programa rua ba arte marsiais, ne’ebé fó kompetensia ba KRAM nune’e kontinua dezenvolve arte marsiais hanesan, oinsá apoiu finanseiru no buka rezolusaun konflitu sira, presiza halo dialogu, edukasaun sivika no konsolida hosi organizasaun ba ranting sira iha territóriu laran tomak.
Nia dehan, organizasaun sira ne’ebé loke ranting la prienxe rekizitu sei la hetan finanseiru hosi Governu, politika apoiu arte marsiais ne’e politika VIII Governu konstituisional.
Iha momentu ne’ebá diskusaun iha Parlamentu Nasionál konsege aprova 2.5 millaun hosi orsamentu retifikativu 2022 nian. Ida ne’e apoiu ona kuaze 700 mill ba organizasaun 16, osan ne’e apoiu ba arte marsiais sira durante tinan tolu.
Tanba ne’e, husu ba Organizasaun PSHT Timor Leste organiza aan para nafatin hetan finanseiru, osan ne’e organizasaun nian la’ós KRAM entaun tau aan didi’ak iha futuru. Entaun, organiza aan hanesan resensiamentu, kompetisaun no formasaun.
JHD
