Dili — Governu liu hosi Ministeriu Juventude Desportu Arte no Kultura (MJDAK),orgullu ho atleta Paralimpiku Timor Leste, ne’ebe mak susesu lori fila medalla osan mutin ida mai Timor Leste iha eventu Asian Para Games Hangzhou China.
Eventu Asian Para Games ne’e nuudar festa Despotu ne’ebe realiza kada tinan haat dala ida no iha tinan ne’e Timor Leste ne’ebe mak partisipa ho nia modalidade potensial tolu hanesan Para- Atletismu, Para-Tenis meja no Para-Powerlifting ho total hamutuk nain 11 susesu lori fila medalla osan mutin ida. Eventu ne’e rasik abertura iha loron 15-28 fulan outubru tinan ne’e.
Hafoin halo reuniaun ho delegasaun no atleta Paralimpiku iha sala reuniaun gabineti diresaun jeral Joventude no Despotu Lecidere Dili segunda (30/10), Ministru Joventude Despotu Arte no Kultura (MJDAK) Nelyo Isac Sarmento espresa sentimentu kontente, laos tanba manan ou lakon maibe ho prezensa atleta sira iha eventu refere bele aprende ona buat ruma hodi perpara ba futuru.
“Hau la triste liu, hau kontente los hare ita boot sira hau kontente laos tanba ita atu manan ka lakon, primeiru husi ita boot sira nia prezensa nee bele aprende buat barak,”tenik nia ba jornalista sira iha MJDAK, Largo Lecidere,Dili,segunda (30/10/2023).
Governante nee dehan ho esperensia sira partisipa iha eventu refere no hare rasik kondisoens no fasilidades bele lori ona hanoin ruma mai Timor Leste atu nunee prepara kondisoens iha Timor Leste molok ba partisipa.
“Parabens ba Teofilo neebe bele reprezenta ita hotu pelumenus iha neetik ida neebe bele lori paralimpiku Timor Leste nia naran hamorin iha jogus Asian Para Games iha Hangzou Xina,”deham nia.
Iha fatin hanesan Xefi Misaun ,Cesario da Silva hatete, maneira barak atu lori Timor Leste nia naran iha mundu hanoin desportu hanesan parte ida atu halo promosaun Timor Leste nia naran ba iha mundu.
“Nudar atleta paralimpiku hamorin naran Timor -Leste iha mundu, Tanba nee ami hanoin atleta nain 11 ba Xina nee laos ba partisipa maibe ba kompete no ami konsege lori medalha osan mutin ida mai iha Timor-Leste hafoin atleta Teofilo sai segundu lugar,” dehan nia.
Enkuantu Medalla osan mutin ne’ebe Timor Leste hetan, oferese hosi atleta Para-Atletizmu, Teofilo Freitas ho klase T-38 ne’ebe mak korida 1500 metro no okupa iha pozisaun daruak ho tempu 4.21.75s.
JHD
