DILI– Jogu kontinuasaun Liga Futsal Timor Leste primeira divizaun jornada da-6, Boa Sorte Fc susesu koileta pontus tolu (3), hafoin “huan” nia adversariu Mushila Fc ho score fantastiku 5-1.
Hala’o jogu iha kampu F-FDTL fatuhada Dili segunda (06/11), ekipa rua hala’o jogu ho kompetetivu tebes desde inisiu jogu maibe ekipa Boa Sorte ne’ebe mak domina liu bola konsge mereka kedas golu ne’ebe lais iha minutu 2 liu hosi asaun Reinaldo Alves hodi hatuur score sa’i 1-0.
Sofre uluk golu ida halo Joao Paulo Canizo ho nia ekipa tenta hodi lansa presaun makas ba ekipa Boa Sorte Fc Maibe tama ba iha minutu 6 rede Mushila Fc nakles hikas nafatin liu hosi Reinaldo Alves hodi hasae score ba 2-0.
Mushila Fc ne’ebe mak sofre ona golu rua tenta nafatin halo presaun oioin hodi bele responde maibe Reinaldo Alves marka tan nia naran ba datoluk iha minutu 14 hodi haboot score sa’i 3-0.
Ho score tensi jogu mantein namans ba ekipa rua hodi lansa kontra atake ba malu maibe to’o termina jogu primeira parte score 3-0 mantein la muda.
Kontinua ba segunda parte Mushila Fc ne’ebe mak sofre uluk golu tolu iha primeira parte konsege responde kedas golu ida iha minutu 22 liu hosi asaun Marcos Freitas hodi hamihis score ba 3-1.
No tama ba iha minutu 26 kapitaun ekipa Mushila Fc Joao Paulo Canizo halo blunder/ auto golu hodi halo ekipa Boa Sorte haboot liu tan score sa’i 4-1.
Ho score refere halo tenis sa’i manas liu tan maibe Boa Sorte Fc no tama ba iha minutu 34 Mushila Fc obrigado tenke joga sein nia kapitaun ekipa Joao Paulo Canizo hafoin hetan kartaun mean.
Jogu sein kapitaun halo ekipa Mushila Fc hahu lakon vontade ho nune’e tama ba iha minutu 38 Reinaldo Alves marka tan nia naran ba da-haat hodi hasae score sa’i 5-1, no score mos mantein to’o termina jogu segunda parte vitoria ba Boa Sorte Fc.
Ho vitoria ne’e la muda pozisau ekipa rua Boa Sorte Fc mantein iha pozisaun 8 ho pontus 6, hosi jogu dala 6 manan rua no deorta dala haat.
Enkuantu ekipa Mushila Fc mos mantein iha pozisaun da-5 ho pontus 7 hosi jogu dala 6 manan rua empata ida no derota dala tolu.
No dadaun ne’e skip Mauputar Fc mak lidera hela tabela klasifikasaun provizoriu ho pontus 15 hosi jogu dala 5 manan hotu.
JHD
