Dili–Kompetisaun Liga Futsal Timor Leste priemeira divizaun epoka 2023-2024 sei kompetetivu liu tan to’o iha jornada ikus tanba ekipa zigante Ramelau Fc no Mauputar Fc to’o iha jornada da-8 ne’e iha pontus hanesan.
Maske ho pontus hanesan maibe ekipa kampeaun Pra Liga Futsal Timor Leste Epoka 2021, Ramelau Fc liu Mauputar Fc ho produtividade golu.
Hahu hosi jornada dahuluk to’o iha jornada da-7 Mauputar Fc Nafatin ukun Liga Futsal Timor Leste maibe iha jornada da-8 Ramelau Fc susesu manan adversariu Because United ho score boot 15-0 ho vitoria ne’e lori kedas Ramelau Fc ukun hikas Liga futsal Timor Leste ho pontus 22 no liu mos produtividade golu hamutuk 9.
Enkuantu ekipa Mauputar Fc mos susesu rekoila pontus 3 iha jogu da-8 ne’e hafoin manan ho score 5-2, kontra Sao Francisco Xavier, ho rezultadu refere hatuur hikas Mauputar Fc iha pozisaun daruak ho pontus 22.
Hosi rezultadu tabela kalsifikasau refere obriga ekipa zigante rua tenke luta to’o fin foin determina ekipa ne’ebe mak sei sa’i kampeaun.
Iha jornada ikus Ramelau Fc sei kontra Mushila Fc no Mauputar Fc sei kontra Gamer Fc hodi determina kampeaun dahuluk Liga Futsal Timor Leste primeira divizaun epoka 2023-2024
JHD
