DILI– Futsal iha Timor Leste hahu ona ba Liga profesional, maibe ho kondisaun kampu ne’ebe mak la priense kriteria sei sa’i perkupasaun ba klubu no futsalista sira ho nune’e Asosiasaun Futsal Timor Leste (AFTL ) ne’ebe mak nuudar komisaun organizadora ba Liga futsal sei tau Esperansa boot lideransa foun FFTL bá periode 2024-2026 atu bele rezolve.
Liga futsal profesional ba dahuluk ofisialmente termina ona no klubu Mauputar Fc mak sa’i kampeaun ho pontus 25 maske pontus hanesan ho Ramelau Fc maibe Mauputar Fc liu ho produtividade golu.
Iha intervista ho Prezidente Klubu Mauputar Fc Antoninho Junior informa, husu ba AFTL se bele tenke iha kampu indor tanba tama ona ba iha Liga Profesional.
“Buat ida ne’ebe ke ita persija husu ba sira mak ami nia hakarak ne’e se bele ita iha kampu futsal indoor diak ida tanba ita agora Liga profesional ne’e minimu ita tenke iha kampu diak ida atu nune’e Torneo Liga ita bele uza kampu ne’e rasik” dehan Antoninho Junior ba jornalista sira iha City-8 Manleuana, Dili Sabadu (02/12).
Aumezmu tempu se wainhira selesaun nasional atu ba liur tenke iha kampu ida ne’ebe diak hodi treinu nune’e labele lakon osan barak liu ba halo treinu iha liur.
“Maibe Ita uza kampu ne’e hodi sa’i treinu lor-loron hodi ba kompete iha internasional hanesan AFF no AFC sira”
“Iha kampu futsal Baziku liu, ita tenke segundu ita tenke iha orsamentu ne’ebe sufisiente” Nia afirma
Iha fatin hanesan Prezidente FC Coelho, Arquimedes Lebre, kampu sa’i komplikadu boot espera ke ba oin sei hadia diak liu tan
“Kampu mais importante liu tanba durante ne’e ita haree hosi ikus ona ba antes atu ba final ne’e kampu sa’i komplikadu boot, sa’i problema boot ba Liga Hau hanoin ne’e mos buat esperensia foun mai ita Liga ne’e komesa iha Timor espera ke ba oin sei hadia diak liu tan” Arquimedes Lebre
Iha sorin seluk Mellor markador ba priemeira divizaun Gelvanio Marcal hatete, kampu sei sa’i dezafiu tanba kampu ida deit persija kria Kampu futsal rua ou tolu tan.
“Ha’u sente kampu sa’i dezafiu se ita joga iha kampu ida deit ne’e difisil ita persija tan kampu rua tolu atu nune’e ita nia kompetisaun bele uza kampu sira seluk Lae joga oras fatin ida deit” Gelvanio Marcal.
Nune’e mos Mellor markador segundu divizaun, Antonio Vasco Ximenes “Noni” hatete, persija hadia kampu hodi tau indor.
“Kampu sei perkupasaun tanba ita uza kampu ida deit rekomenda ba komisaun organizadora para hadia tan kampu hanesan tau indoor para udan mai mos Ita bele kontinua jogu” dehan Noni.
Hatan ba perkupasaun hosi klubu no jogador sira nia ne’e Sekretariu jeral AFTL Fernando Baptista hatete, asuntu refere sira aprosima ona ho parte estrutura FFTL atual tanba ba oin Timor Leste komesa partispa ona laos taxa AFF deit maibe sei partisipa mos Taxa AFC.
“Foin dadaun ita ba Ita Nia jogador sira ba, Ita nia problema ida mak Ita Nia Kampu uza la estandar entaun Ita ba ne’eba difisil duni”
“Sim lideransa foun ne’ebe mak Mai priemeiru ninia atensaun jeral ba bola i sepesial ba futsal ida Ne’e mak ita parte AFTL prefere atu nune’e ita bele dezenvolve ita nia futsal ne’e diak liu tan” tenik Fernando.
Entertantu Kongresu Extraoridinariu FFTL bá periode 2024-2026 sei akontese iha loron 10 fulan Janeiro tinan 2024, no dalan ba kongresu extraoridinariu ne’e hahu hamosu ona rumores Oi-oin iha amantes futebol sira nia tilun katak sei hamosu pakote rua hanesan eis prezidente LFTL Nilton Gusmão ne’ebé hanesan mos pioneru ba liga Futeból Timor-Leste hahu ho LFA mai too LFTL, mak sei kompete ho eis prezidente FFTL Francisco Kalbuadi Lay.
JHD
