Congresso Ordinario FFTL ba-dala IX iha 10 Janeiro 2024 sei sai hanesan barômetro ida lori sukat oinsa “Vontade” no vizaun associação futebol, dirigentes no sosiedade bola (ema hotu) ne’ebé durante ne’e serbisu maka’as no buka método oinsá dezenvolve futeból ne’ebé tinan 20 ona sei hasoru hela “problemas Clássicos” hanesan falta fundos, laiha progressos, laiha dezenvolvimento infraestruturas no seluk-seluk tan.
Buat hirak ne’e durante tinan barak nia laran hanesan laiha solusaun. Se karik ita halo analogia ba ema moras, nunka hetan “aimoruk atu kura”.
Ita hotu hatene Futeból hanesan Modalidade desportu ne’ebé koñesido tebes iha mundo no atrai tebes ema barak hahú hosi labarik to’o katuas. Futeból la’ós desportu ne’ebé foun iha sosiedade Timor-Leste.
Hahú kedan iha tempu kolonializmu portugûes to’o Indonézia ita iha futebolista koñesidu barak ne’ebé hatudu prestasaun di’ak no kompetisaun iha ita-nia rai laran rasik anima tebes ita nia sosiedade hadomi Futeból.
Iha tinan 2005 bainhira ofisialmente FFTL afilia nu’udar membru Fédération Internationale de Football Association – FIFA, sosiedade futeból lakon tiha esperansa no futebol ida ne’ebé atrai tebes ema hotu sai fali preokupasaun públiku tamba futeból paradu iha tempo naruk no aat liu tan lideransa FFTL iha tempú ne’ebá hetan akuzasoens oin-oin hosi organizasaun AFC no FIFA.
Sosiedade Futeból hahú iha fali esperansa foun bainhira Sr. Francisco Kalbuadi Lay rezigna aan hosi nia kargu nu’udar Prezidente Ezekutivu FFTL iha tinan 2017 no liuhosi desijaun Komité Ezekutivu FFTL deside halo re-estruturasaun provizóriu hodi indika Sr. Osório Florindo kontinua asumi kna’ar nu’udar Prezidente Interino ho nomea Sr. Nélio Isác Sarmento ba Sekretáriu-Jerál Interino hodi troka Sr. Amándio de Araújo Sarmento nebé altura nebá hetan sansaun hosi Komité Disiplinár AFC tan komete kazu falsifikasaun dokumentus ba naturalizasaun jogadores nebé akontese iha tempu Francisco Kalbuadi Lay sei hakna’ar aan nu’udar Prezidente FFTL, maski Sr. Amandio de Araújo Sarmento rasik deklara ona prosesu naturalizasaun né desijaun koletiva hosi membrus Ezekutivu FFTL lideradu Francisco Kaluadi Lay, maibé to’o ikus sira na’in rua Ofisiál FFTL Gelásio da Silva Carvalho mak sai mesak vítima ba kazu né hodi hetan sansaun labele mete futeból durante tinan tolu (3) no selu multa ho montantes diferentes $9,000 no $3,000, nuné mós em nome organizasaun FFTL mós selu multa $29,000 ba AFC no selesaun nacional Timor-Leste sei la partisipa Asian Cup hosi tinan 2017-2023. Kazu sira ne’e faktus nebé akontese iha lideransa Francisco Kalbuadi Lay nian bainhira nia lidera FFTL nu’udar Prezidente Ezekutivu.
Depois de mandato Sr. Osório Florindo remata iha 2018, FFTL realiza Kongresu Ordinário hodi hili estrutura Komité Ezekutivu foun ba periodu 2018-2022 no Sr. Franciso Kalbuadi Lay kontinua kompete maibe rezigna an iha loron rua antes atu tama iha kongresu no halo manobra tun sa’e hodi troka kandidatura ba fali Sr. Francisco Jerónimo no rezulta Sr. Francisco Jeronimo sai duni Prezidente FFTL periódu 2018-2022, ironia tebes. Sr. Francisco Jerónimo kontinua eleitu nu’udar Prezidente FFTL ba periódu 2022-2026 iha kongresu ba-dala VII hodi halakon adversário Sr. Francisco Kalbuadi Lay (Rezigna aan iha primeira votasaun) no Sr. Nilton Telmo Gusmão dos Santos.
Inísio tinan 2023 Sr. Francisco Kalbuadi Lay hahu akumula forsa hodi hamonu Prezidente Sr. Francisco Jerónimo no Sr. Falur Rate Laek nu’udar Vice-Prezidente FFTL liuhosi petisaun ne’ebé deklara husi 16 Asosiasaun (membrus FFTL) no konsege duni maibe sorte aat ba Sr. Francisco Kalbuadi Lay atu apodera direta kargu nu’udar Prezidente FFTL la konsegue tamba la hetan autorizasaun hosi ASIAN Football Confederation – AFC no FIFA nune’e mós estatuto FFTL rasik la fó dalan.
Nune’e Sr. Francisco Jerónimo rezigna aan no Prezidente Interino FFTL asumi husi Sr. Falur Rate Laek to’o Kongresu Ordináriu ne’ebé deside ona iha dia 10 janeiru 2024 no sei kompete hosi Sr. Francisco Kalbuadi Lay no Sr. Nilton Telmo Gusmão dos Santos.
Mai ita sani perfis candidato na’in rua nian:
- Francisco Kalbuadi Lay, nu’udar figura tuan iha FFTL, públiku la kestiona nia kapasidade
ho lobby diplomásia iha palku futeból mundiál, maibe wainhira haré ba prestasaun futebúl durante nia mandatu iha periódu 2002-2007 no 2008-2017 laiha prestasaun di’ak ida ne’ebé bele fo orgulho ba ita re-lembra fali FFTL iha Francisco Kalbuadi nia lideransa hanesan loke fali kanek tuan nebé husik hela fitar bo’ot iha memória amantes no públiku hadomi futeból Timór. Sei fresku hela iha ita-hotu nia memória, Sr. Kalbuady Lay nia lideransa akontese kazu oioin hanesan escândalos match fixing, Falsifikasaun idade jogadores, naturalizasaun jogadores ho dalan ilegal no seluk-seluk tan. akontesimentu hirak ne’e envolve ninia estrutura no sai hanesan nota mean ida ba Sr. Kalbuady Lay nia CV.
Re-kandidatura Francisco Kalbuadi Lay ba Prezidenti hanesan actos atu akumula de’it cargos do que dezenvolve futebol.
Asosiasaun ho entidades hotu futeból tenki konsidera no hanoin katak oras ne’e Sr. Kalbuady asumi hela pasta lima (5) kompostu pasta tolu (3) iha IX Governu Konstitusionál, Prezidente Comité Olímpico Nacional de Timor-Leste – CONTL no Sekretáriu-Jerál partidu CNRT, ho serbisu barak nebé nia asumi, susar ba nia atu foku máximu ba dezenvolve futeból, maibé nia sei lidera liuhosi orientasaun no remote control de’it ba membrus estrutura sira. Federasaun Futeból labele sai fatin ba one man show hodi hamout tan públiku nia mehi hakarak futeból Timor sai di’ak liután iha futuru lori fo ksolok no orgulho ba Timor-oan tomak nebé hadomi desportu futeból.
- Nilton Telmo Gusmão, idade foin sa’e, empresário de sucesso no magnata petróleo, la’os ema foun iha mundo futebol Timór. Nilton hanesan foinsa’e ida nebé lori espíritu foun nakonu ho paixão ba futeból Timor-Leste dezde hahú hosi Timor-Leste hetan nia ukun rasik an. Iha tinan 2000 altura situasaun difisil, ho nia kolega amantes futeból sira organiza Taça Esperança, no iha tinan hanesan hari’i ka funda klube Radio FALINTIL – RAFA hodi partisipa iha jogus internasionais (Timor Cup) iha Darwin no Melbourne; tinan 2001 envolve an iha primeira estrutura FFTL nebé hari’i FFTL; tinan 2003-2012 transforma klube RAFA ba A.D. ESPERANÇA hodi partisipa iha jogus Taça Presidente, Independençia Cup, Pra-Liga no seluk-seluk tan; além de ne’e nia mos simu kna’ar nu’udar Prezidente Liga Futebol Amadora – LFA (2015-2020) & Prezidente Liga Futebol de Timor-Leste – LFTL (2020-2022) no konsege ho susesu introdúz konseitu futeból ba baze (Baucau, Maliana no Gleno), no fasilita clube Lalenok United partisipa jogu AFF – AFC Cup tinan 2019, maski ikus mai la konsege termina nia mandatu iha segundu periódu tan nia hili dalan rezigna an ho razaun atu salva futeból iha Timor-Leste, ida ne’e la hases Nilton nudar figura potensiál ho vizaun nebé di’ak atu dezenvolve futeból, nia dedikasaun no perzisténsia laiha dúvidas, ezemplu hosi nia serbisu maka’as konsege transforma ETO husi distributór mina ki’ik ida iha inísia ukun an sai empreza Multi Nacional iha espasu menus husi tinan 10.
Nilton nia re-candidatura ba Congresso Ordinário FFTL 10 de Janeiro 2024 nia deposita fiar ho mehi bo’ot ida atu dezenvolve Futeból no infra-estruturas sira hodi transforma futebol Timor-Leste ida kompetitivu liu iha palku Sudeste Asiático – ASEAN.
Asosiasaun Munisipais, Asosiasaun Profisionais no clubes ne’ebé iha direitos de votos presija tetu impactos, vizaun ho mehi ba futuro foun hosi candidatos na’in rua atu bele transforma Futeból Timór no fó oportunidade ba labarik ho foinsa’e Timor-oan sira ne’ebé mehi hakarak sai Futebolista Professional iha futuru.
Depois de congresso, Futebol Timor sei tama iha vizaun foun ou Maldisaun foun?
Saudações Desportivas!
Hakerek na’in, Observadór hosi Sosiedade hadomi Futeból
