DILI – Oitavu Governu Konstitusionál, atraveza husi Sekretariu Estadu Juventude no Desportu (SEJD), preve orsamentu milliaun 2.6, hodi harii Sede ba Arte Marsiais hotu iha territóriu nasionál.
Kestaun ne’e hato’o husi Sekretáriu Estadu Joventude no Desportu (SEJD), Abrao Nokosiku Saldanha, ba Jornalista sira iha edifisiu SEJD tersa (31/05).
Governante ne’e haktuir, dadaun ne’e sira kria ona Kriteria no prosedimentu atu asesu ba apoiu, Arte Marsiais hotu la’ós de’it ba Modalidade Arte Marsiais tolu hanesan IKS, PSHT, no KORK.
“Tinan ne’e ita tau 2.6 miloens, iha hela Ministru finansas nia fatin, aban bairua ita sei servisu ho gabinete Primeiru Ministru, atu ezekuta orsamentu ida ne’e, SEJD ho KRAM defini Kriteriu prosedimentu kondisoens arte Marsiais atu aplika ne’e tenke priense Kriteriu ida ne’e” tenik SEJD Abrao.
Abrao explika, Agora orsamentu ne’e iha Ministru finansas, no sei ezekuta ho SEJD, no gabinete Primeiru Ministru, liu husi gabinete sosiedade sivil.
Organizasaun tenke iha rezistu iha notariadu tenke iha estrutura ne’ebé tenke eleitu husi orgaun sira nian no tenke iha membru no mós iha administrasaun
“Ami sei bolu Modalidade Arte Marsiais sira hotu ida ne’ebé mak hakarak harii sira nia Sede” tenik nia
Kona-ba fatin Sede sira ne’e mak atu harii Governante ne’e hatete, governu deside hodi harii uluk iha nasionál.
“Agora ita halo de’it ba sira iha nasionál, atu harii iha ne’ebé ne’e depende ba kondisoens kada organizasaun balu iha ona ita bele rehabilita de’it ou harii fali foun, balu la iha ajuda buka rai ho sira, agora halo iha Dili de’it“
Iha sorin seluk Sekretariu jerál Federasaun Karate-do Timor Leste (FEKATIL), António Carlos de Araújo, hatete, nia parte kontinente ho planu governu ne’ebé mak atu harii Sede ba Arte Marsiais
“Se halo ba arte Marsiais hotu hotu ami kontente ” tenik nia.
CharllY Junior
