Dili– Klubu promovidu Atletico Ultramar/ Coracao Fc kontinua lidera iha tabela klasifikasaun provisoriu Liga Timorense epoka 2022-2023, hafoin emapata ho nia adversariu AD SLB ho score 1-1.
Jogu entre ekipa rua ne’e hala’o iha Stadion Munisipal Dili, kuarta (22/02), iha inisiu jogu ekipa uma nain Makikit Laulara hatudu jogu furak hodi domina tebes jogu hodi lansa kontra atake fila fila ba rede Atletico Ultramar/Coracao Fc maibe guarda defensivu hosi Atletico Ultramar/ Coracao Fc nafatin la fo fatin ba ekipa AD SLB hodi marka golu.
Enkuantu ekipa Atletico Ultramar/ Coracao Fc, la nonok deit maibe Atletico Ultramar Coracao mos lansa kontra atake ne’ebe makas maibe defeza hosi AD SLB ne’ebe mak komanda hosi Filomonio da Costa ne’e mantein solidu hodi la fo fatin ba ekipa Ultramar Coracao hodi suta ba rede AD SLB.
Tama ba iha minutu 35 AD SLB lidera kedas ho score 1-0, liu hosi jogador estranjeiru Bakayoka Ozi.
Jogador ho nasionalidade Ganha ne’e marka golu hafoin hetan asistensia bola hosi nia kompatriota Konelis Portela iha area grandeal Ultramar Coracao nian.
Ho golu ne’e jogu sa’i manas liu tan maibe ekipa AD SLB ne’ebe mak hatudu jogu hosi ain ba ain mantein domina bola maibe la konsege produs tan golu ruma to’o termina jogu primeira parte score mantein 1-0.
Kontinua ba jogu segunda parte ekipa rua ne’e hasae liu tan ritmu jogu hodi halo kontra atake ba malu ho nune’e tama ba iha minutu 62 Carlos Ximenes liu hosi sutu penalidade.
Atlettico Ultramar Coracao Fc hetan penalidade refere hafoin linha defensivu hosi AD SLB komete erru hasoru Miguel Barbosa iha area grandeal ho nune’e arbitu deside penalidade ba Atletico Ultramar Coracao.
No jogador Carlos Ximenes ne’ebe mak sa’i ezekutor ba penalidade refere susesu fura rede AD SLB hodi hatuur score ba 1-1.
Ho golu jogu sa’i manas liu tan ba ekipa rua hodi lansa kontra atake ba malu maibe to’o termina jogu segunda parte la iha tan golu ruma mak akontese.
Hosi rezultadu empata ne’e hatuur ekipa Atletico Ultramar /Coracao Fc nafatin ukun iha tabela klasifikasaun provizoriu primera divizaun Liga Timorense epoka 2022-2023 ho pontus 4 hosi jogu dala rua manan ida no emapata ida.
Enkuantu ekipa AD SLB okupa iha pozisaun (6) ho pontus (1) hosi jogu dala ida ne’ebe mak empata.
DVO
